पुणे | प्रतिनिधी
लोणीकंद पोलिस स्टेशन हद्दीत अवैध गावठी दारू निर्मिती व विक्री करणाऱ्यांवर पोलिसांनी मोठी कारवाई करत हातमडी उद्ध्वस्त केली असून एका आरोपीस अटक करण्यात आली आहे. या कारवाईत मोठ्या प्रमाणात दारू व साहित्य जप्त करण्यात आले आहे.
वरिष्ठांच्या आदेशानुसार सुरू असलेल्या ‘फ्लश आऊट ऑपरेशन’ अंतर्गत दिनांक १३ एप्रिल २०२६ रोजी पोलिस पथक गस्त घालत असताना पोलिस अंमलदार जाधव यांना गुप्त बातमीदारामार्फत माहिती मिळाली. मौजे हिंगणगाव, ता. हवेली, जि. पुणे येथील शेतकरी संतोष बाळासाहेब मुर्कुटे यांच्या शेताजवळील जंगल परिसरात एक इसम मोठ्या प्रमाणात गावठी दारू तयार करत असल्याची माहिती मिळाली.
या माहितीच्या आधारे पोलिस उपनिरीक्षक अर्जुन बेंडबुडे व त्यांच्या पथकाने संबंधित ठिकाणी छापा टाकला. छाप्यात पोलिसांनी आरोपी सचिन मकरसिंग नानावत (वय २७, रा. रामकृष्ण हरी मंगल कार्यालयाजवळ, राहू रोड, आष्टापुर फाटा, पुणे) याला रंगेहात पकडले.
कारवाईदरम्यान पोलिसांना विविध प्लास्टिकच्या टाक्यांमध्ये आंबलेले रसायन, दारू तयार करण्यासाठी लागणारे साहित्य तसेच अंदाजे १३,७०० लिटर कच्चे रसायन आणि ६५० लिटर तयार गावठी दारू असा मोठा साठा आढळून आला. यासोबतच हातमडीसाठी वापरण्यात येणारे लोखंडी ड्रम, प्लास्टिक टाक्या व इतर साहित्य जप्त करण्यात आले. एकूण मुद्देमालाची किंमत अंदाजे १३ लाख १२ हजार ५०० रुपये इतकी असल्याचे पोलिसांनी सांगितले.
या प्रकरणी लोणीकंद पोलिस स्टेशन येथे गुन्हा दाखल करण्यात आला असून आरोपीला अटक करण्यात आली आहे. पुढील तपास पोलिस उपनिरीक्षक अर्जुन बेंडबुडे करत आहेत.
ही कारवाई पोलिस उपआयुक्त, परिमंडळ ७ यांच्या मार्गदर्शनाखाली तसेच सहाय्यक पोलिस आयुक्त आणि वरिष्ठ पोलिस निरीक्षक यांच्या सूचनांनुसार पार पडली. कारवाईत पोलिस कर्मचारी स्वप्नील जाधव, कैलास साळुंखे, सागर जगताप, संतोष अंडुरे, मल्हारी सुपे, शुभम चिंके, सुधीर शिंदे व दिनेश मरकड यांनी सहभाग घेतला.
पोलिसांनी दिलेल्या माहितीनुसार, अवैध दारू निर्मिती व विक्री करणाऱ्यांविरुद्ध अशी कारवाई पुढेही सुरू राहणार असून नागरिकांनी अशा प्रकारांची माहिती तात्काळ पोलिसांना द्यावी, असे आवाहन करण्यात आले आहे.
नियम व अटी / Disclaimer:
वरील माहिती विविध ओपन सोर्स माध्यमांतून, सोशल मीडियातील चर्चांमधून तसेच उपलब्ध असलेल्या सार्वजनिक वाचन-सामग्रीवर आधारित आहे. “क्राईम महाराष्ट्र लाईव्ह न्युज” (Crime Maharashtra Live News) व त्याचे संपादक, प्रतिनिधी किंवा संबद्ध कर्मचारी या माहितीच्या संपूर्ण सत्यतेचा दावा करत नाहीत.ही माहिती केवळ जनहितार्थ, समाजजागृती व चर्चेसाठी प्रसिद्ध करण्यात आलेली आहे. कृपया वाचक/दर्शकांनी संबंधित अधिकृत यंत्रणांकडून खातरजमा करूनच कोणताही निर्णय घ्यावा. या माहितीमध्ये काही बाबी चुकीच्या, अपूर्ण किंवा कालांतराने बदललेल्या असू शकतात. त्यामुळे कोणतीही कायदेशीर अथवा प्रशासकीय कृती करण्यापूर्वी अधिकृत स्रोताची खात्री करणे अत्यावश्यक आहे.. तथापि, या बातम्यांमुळे उद्भवणाऱ्या कोणत्याही गैरसमज किंवा नुकसानीस Crime Maharashtra Live News जबाबदार राहणार नाही.> टीप: जर कोणाला आमच्या बातमीबाबत आक्षेप असल्यास, कृपया आम्हाला [crimemaharashtra.live@gmail.com] वर संपर्क करा.मोबाईल नंबर 7744808833
