“जागतिक ॲथलेटिक्स दिनानिमित्त युवा खेळाडूंना प्रेरणेची नवी दिशा”
महा सब ज्युनियर स्पोर्ट्स डेव्हलपमेंट फेडरेशनतर्फे खेळाडू, प्रशिक्षक व संस्थांचा गौरव
पुणे : जागतिक ॲथलेटिक्स दिनानिमित्त महा सब ज्युनियर स्पोर्ट्स डेव्हलपमेंट फेडरेशनच्या वतीने सारसबाग येथील बाळासाहेब ठाकरे कलादालन येथे उत्कृष्ट क्रीडा खेळाडू, आदर्श क्रीडा प्रशिक्षक, आदर्श क्रीडा संघटना, उत्कृष्ट क्रीडा क्लब सन्मान तसेच कै. मोहन नारायण कोठुळे यांच्या स्मृतिप्रीत्यर्थ क्रीडा शिष्यवृत्ती वितरणाचा प्रेरणादायी कार्यक्रम उत्साहात पार पडला.
या कार्यक्रमाला प्रमुख पाहुणे म्हणून राजू कुलकर्णी (सेक्रेटरी, पुणे जिल्हा ॲथलेटिक्स संघटना), डॉ. मदन कोठुळे (उपाध्यक्ष, इंडियन अमॅच्युअर बॉक्सिंग असोसिएशन), अनंत घरत (राज्य संघटक, महा सब ज्युनियर फेडरेशन) तसेच क्रीडा प्रशिक्षक सचिन धुरगुडे उपस्थित होते.
पाहुण्यांच्या हस्ते रोपाला पाणी घालून कार्यक्रमाची सुरुवात करण्यात आली. तसेच उपस्थित मान्यवरांचा पुष्पगुच्छाऐवजी फुलांच्या रोपांच्या कुंड्या देऊन पर्यावरणपूरक पद्धतीने सन्मान करण्यात आला.
यावेळी बोलताना डॉ. मदन कोठुळे यांनी महा सब ज्युनियर फेडरेशनच्या माध्यमातून सब ज्युनियर खेळाडूंना दिल्या जाणाऱ्या मदत व मार्गदर्शनाचे कौतुक करत भविष्यात क्रीडा शिष्यवृत्ती वाढविण्यासाठी सहकार्य करण्याची ग्वाही दिली.
अनंत घरत यांनी सांगितले की, “फेडरेशनच्या माध्यमातून सब ज्युनियर खेळाडूंना सक्षम व्यासपीठ उपलब्ध करून देण्याचे काम सुरू असून भविष्यात महाराष्ट्रातून अधिकाधिक खेळाडू ऑलिंपिक स्पर्धांमध्ये झळकावेत, हे आमचे ध्येय आहे.”
जागतिक ॲथलेटिक्स दिनाच्या निमित्ताने आयोजित या कार्यक्रमातून लहान खेळाडूंना क्रीडेसोबतच पर्यावरण संवर्धनाचाही महत्त्वपूर्ण संदेश देण्यात आला.
या प्रसंगी उत्कृष्ट खेळाडू म्हणून आर्य धोत्रे, समर्थ कर्वे व काव्या कोल्हटकर यांचा सन्मान करण्यात आला. आदर्श क्रीडा प्रशिक्षक म्हणून घनश्याम घोंघडे, मनाली देव व धनंजय चिंचणीकर यांना गौरविण्यात आले. तसेच फेडरेशनच्या वतीने ओजस जाधव, प्रचित सांगवे आणि शिवराज शोभणे या बाल खेळाडूंना क्रीडा शिष्यवृत्ती प्रदान करण्यात आली.
आदर्श क्रीडा संघटना म्हणून पुणे जिल्हा ॲथलेटिक्स संघटना तर उत्कृष्ट क्रीडा क्लब म्हणून एकलव्य ॲथलेटिक्स क्लबचा सन्मान करण्यात आला.
कार्यक्रमाचे प्रभावी सूत्रसंचालन महेश चरवड यांनी केले. प्रस्तावना करताना क्रीडा संघटक अमोल घोडके यांनी लहान वयात क्रीडा प्रशिक्षणाचे मुलांच्या आरोग्य व उज्ज्वल भविष्यासाठी असलेले महत्त्व अधोरेखित केले. कार्यक्रमाचे आभार प्रदर्शन राज्य सचिव सागर धाडवे यांनी केले.
नियम व अटी / Disclaimer:
वरील माहिती विविध ओपन सोर्स माध्यमांतून, सोशल मीडियातील चर्चांमधून तसेच उपलब्ध असलेल्या सार्वजनिक वाचन-सामग्रीवर आधारित आहे. “क्राईम महाराष्ट्र लाईव्ह न्युज” (Crime Maharashtra Live News) व त्याचे संपादक, प्रतिनिधी किंवा संबद्ध कर्मचारी या माहितीच्या संपूर्ण सत्यतेचा दावा करत नाहीत.ही माहिती केवळ जनहितार्थ, समाजजागृती व चर्चेसाठी प्रसिद्ध करण्यात आलेली आहे. कृपया वाचक/दर्शकांनी संबंधित अधिकृत यंत्रणांकडून खातरजमा करूनच कोणताही निर्णय घ्यावा. या माहितीमध्ये काही बाबी चुकीच्या, अपूर्ण किंवा कालांतराने बदललेल्या असू शकतात. त्यामुळे कोणतीही कायदेशीर अथवा प्रशासकीय कृती करण्यापूर्वी अधिकृत स्रोताची खात्री करणे अत्यावश्यक आहे.. तथापि, या बातम्यांमुळे उद्भवणाऱ्या कोणत्याही गैरसमज किंवा नुकसानीस Crime Maharashtra Live News जबाबदार राहणार नाही.> टीप: जर कोणाला आमच्या बातमीबाबत आक्षेप असल्यास, कृपया आम्हाला [crimemaharashtra.live@gmail.com] वर संपर्क करा.मोबाईल नंबर 7744808833
