पुणे: पुणे शहर पोलिसांच्या अंमली पदार्थ विरोधी पथक-१ ने खेड शिवापूर टोल नाका येथे मोठी कारवाई करत प्रतिबंधित विमल गुटख्याचा साठा जप्त केला आहे. या कारवाईत एका आरोपीला अटक करण्यात आली असून एकूण ८० लाख ३२ हजार ८०० रुपये किमतीचा मुद्देमाल हस्तगत करण्यात आला आहे.
नेमकी घटना काय?
दिनांक २८/०४/२०२६ रोजी अंमली पदार्थ विरोधी पथक-१ चे अधिकारी व कर्मचारी आंबेगाव परिसरात गस्त घालत होते. यावेळी पोलीस अंमलदार अमोल सरडे यांना त्यांच्या बातमीदाराकडून माहिती मिळाली की, पुणे शहर पोलीस आयुक्तालयाच्या अभिलेखावरील सराईत गुन्हेगारांनी मागवलेला प्रतिबंधित गुटख्याचा ट्रक (क्र. एम.एच.११ डी.डी.-६५२७) कात्रज घाटमार्गे पुण्यात येणार आहे.
मिळालेल्या माहितीनुसार, पोलिसांनी २८ एप्रिलच्या मध्यरात्री ००:३० वाजल्यापासून कात्रज घाटात सापळा रचला होता. मात्र, बराच वेळ होऊनही ट्रक न आल्याने अधिक तपास केला असता, सदर ट्रक खेड शिवापूर टोल नाका येथे थांबल्याची खात्री झाली.
सापळा आणि अटक
वरिष्ठांच्या परवानगीने पुणे शहर पोलिसांनी राजगड पोलीस ठाणे (पुणे ग्रामीण) यांची मदत घेतली आणि खेड शिवापूर टोल नाका येथे उभ्या असलेल्या ट्रकवर छापा टाकला. यावेळी पोलिसांनी ट्रक चालक श्रीशैल तम्माराय हाळके (वय ३२, रा. उमदी, ता. जत, जि. सांगली) याला ताब्यात घेतले. ट्रकची तपासणी केली असता त्यामध्ये महाराष्ट्र शासनाने प्रतिबंधित केलेला विमल गुटखा आढळून आला. हा गुटखा पुणे पोलीस आयुक्तालयातील दोन सराईत आरोपींनी शहरात विक्रीसाठी मागवल्याचे तपासात निष्पन्न झाले आहे.
जप्त केलेला मुद्देमाल:
प्रतिबंधित विमल गुटखा: ६०,२२,८००/- रुपये.
टाटा कंपनीचा ट्रक (MH 11 DD 6527): २०,००,०००/- रुपये.
सॅमसंग मोबाईल हँडसेट: १०,०००/- रुपये.
एकूण किंमत: ८०,३२,८००/- रुपये.
कायदेशीर कारवाई
या प्रकरणी राजगड पोलीस ठाणे (पुणे ग्रामीण) येथे गुन्हा रजिस्टर क्रमांक १६६/२०२६ नुसार भारतीय न्याय संहिता कलम १२३, २२३, २७४, २७५ तसेच सिगारेट व अन्य तंबाखूजन्य उत्पादने अधिनियम आणि अन्न सुरक्षा मानके अधिनियमाच्या विविध कलमान्वये गुन्हा दाखल करण्यात आला आहे.
तपास पथक
ही यशस्वी कारवाई पुणे पोलीस आयुक्त श्री. अमितेश कुमार, सह पोलीस आयुक्त श्री. रंजन शर्मा, अपर पोलीस आयुक्त श्री. पंकज देशमुख, पोलीस उप आयुक्त (आर्थिक व सायबर/गुन्हे) श्री. विवेक मासाळ आणि सहा. पोलीस आयुक्त (गुन्हे ३) श्री. शंकर खटके यांच्या मार्गदर्शनाखाली करण्यात आली.
या पथकात अंमली पदार्थ विरोधी पथक-१ चे वरिष्ठ पोलीस निरीक्षक वाहीद पठाण, सहा. पोलीस निरीक्षक अनिल सुरवसे, पोलीस अंमलदार विठ्ठल साळुंखे, संजय राजे, अमोल सरडे, निलेश जाधव, विशाल भिलारे, मंगेष गुंड, अक्षय शिर्के, महिला पोलीस अंमलदार आशा भिंगारे आणि राजगड पोलीस ठाण्याच्या पथकाचा समावेश होता.
नियम व अटी / Disclaimer:
वरील माहिती विविध ओपन सोर्स माध्यमांतून, सोशल मीडियातील चर्चांमधून तसेच उपलब्ध असलेल्या सार्वजनिक वाचन-सामग्रीवर आधारित आहे. “क्राईम महाराष्ट्र लाईव्ह न्युज” (Crime Maharashtra Live News) व त्याचे संपादक, प्रतिनिधी किंवा संबद्ध कर्मचारी या माहितीच्या संपूर्ण सत्यतेचा दावा करत नाहीत.ही माहिती केवळ जनहितार्थ, समाजजागृती व चर्चेसाठी प्रसिद्ध करण्यात आलेली आहे. कृपया वाचक/दर्शकांनी संबंधित अधिकृत यंत्रणांकडून खातरजमा करूनच कोणताही निर्णय घ्यावा. या माहितीमध्ये काही बाबी चुकीच्या, अपूर्ण किंवा कालांतराने बदललेल्या असू शकतात. त्यामुळे कोणतीही कायदेशीर अथवा प्रशासकीय कृती करण्यापूर्वी अधिकृत स्रोताची खात्री करणे अत्यावश्यक आहे.. तथापि, या बातम्यांमुळे उद्भवणाऱ्या कोणत्याही गैरसमज किंवा नुकसानीस Crime Maharashtra Live News जबाबदार राहणार नाही.> टीप: जर कोणाला आमच्या बातमीबाबत आक्षेप असल्यास, कृपया आम्हाला [crimemaharashtra.live@gmail.com] वर संपर्क करा.मोबाईल नंबर 7744808833
