पुणे: आईच्या प्रियकराचा, मुलीच्या प्रियकराने आपल्या साथीदारांच्या मदतीने डोक्यात सिमेंटचा ब्लॉक घालून निर्घृण खून केल्याची धक्कादायक घटना हडपसर परिसरातील ससाणेनगर येथे घडली होती. या गुन्ह्याचा छडा लावत काळेपडळ पोलिसांनी अत्यंत शिताफीने तपास करून मुख्य आरोपीसह एकूण ६ जणांना ४८ तासांच्या आत अटक केली आहे.
घटनेची पार्श्वभूमी
दिनांक ३ मे २०२६ रोजी ससाणेनगर, हडपसर येथील हिंगणे बिल्डिंगच्या पार्किंगमध्ये ही घटना घडली. फिर्यादीचे पती गणेश संजू बिरादार (वय २५, रा. ससाणेनगर, हडपसर) यांचा आरोपींसोबत तीन महिन्यांपूर्वी वाद झाला होता. याच वादाचा राग मनात धरून मुख्य आरोपी दुर्वांग उर्फ पारस सुनील मानकर आणि साहील सागर शेलार यांनी आपल्या इतर साथीदारांच्या मदतीने गणेश बिरादार यांच्यावर हल्ला केला. आरोपींनी गणेश यांच्या डोक्यात सिमेंटचे ब्लॉक मारून आणि लाथाबुक्क्यांनी गंभीर मारहाण करून त्यांची हत्या केली. याप्रकरणी काळेपडळ पोलीस ठाण्यात गुन्हा रजि. क्र. २०१/२०२६ नुसार भा.न्या.स कलम १०३, १०९, ३ (५) अन्वये गुन्हा दाखल करण्यात आला होता.
तपास आणि अटक सत्र
गुन्ह्याचे गांभीर्य ओळखून वरिष्ठ पोलीस अधिकाऱ्यांच्या मार्गदर्शनाखाली ३ तपास पथके वेगवेगळ्या ठिकाणी रवाना करण्यात आली होती. तांत्रिक तपास आणि गुप्त बातमीदारांकडून मिळालेल्या माहितीच्या आधारे पोलिसांनी सुरुवातीला तीन आरोपींना ७ मे २०२५ रोजी अटक केली:
१. साहील सागर शेलार (वय २४, रा. ससाणेनगर, हडपसर)
२. चंद्रशेखर सोमनाथ जावीर (वय २०, रा. सुखसागर नगर, कात्रज)
३. सुरज रमेश दोरकर (वय २१, रा. गाडीतळ, हडपसर)
या अटकेतील आरोपींच्या चौकशीतून आणि तांत्रिक तपासातून मुख्य आरोपी दुर्वांग उर्फ पारस सुनील मानकर (वय २१, रा. शुक्रवार पेठ, स्वारगेट) हा खेड शिवापूर ते कात्रज परिसरात येणार असल्याची माहिती मिळाली. त्यानुसार सापळा रचून पोलिसांनी मुख्य आरोपीसह त्याच्या खालील दोन साथीदारांना देखील ताब्यात घेतले:
४. दुर्वांग उर्फ पारस सुनील मानकर (मुख्य आरोपी)
५. पारस किशोर गायकवाड (वय २१, रा. दत्तवाडी, सिंहगड रोड)
६. अभि उर्फ अभिजीत संजय इंगळे (वय २२, रा. दत्तवाडी, पुणे)
तपास पथकाची कामगिरी
सदरची उल्लेखनीय कामगिरी पोलीस उप-आयुक्त (परिमंडळ ५) सागर कवडे, सहाय्यक पोलीस आयुक्त अतुलकुमार नवगिरे, आणि वरिष्ठ पोलीस निरीक्षक मानसिंग पाटील यांच्या मार्गदर्शनाखाली पार पडली.
या तपास पथकात पोलीस निरीक्षक (गुन्हे) आण्णासो बाबर, सहाय्यक पोलीस निरीक्षक अमित शेटे, अजय हंचाटे (तपास अधिकारी) आणि पोलीस अंमलदार प्रविण काळभोर, निलेश देसाई, दाऊद सय्यद, प्रतीक लाहिगुडे, अमोल फडतरे, परशुराम पिसे, राजू वाघमारे, शाहिद शेख, बालू ठाकूर, अतुल पंधरकर, महादेव शिंदे, प्रदीप बेडीस्कर, गिरिराज जगदाळे, विशाल ठोंबरे, सद्दाम ताबोळी, राकेश साळुंखे आणि नितीन ढोले यांचा समावेश होता.
या प्रकरणाचा पुढील तपास सहाय्यक पोलीस निरीक्षक अजय हंचाटे करीत आहेत.
नियम व अटी / Disclaimer:
वरील माहिती विविध ओपन सोर्स माध्यमांतून, सोशल मीडियातील चर्चांमधून तसेच उपलब्ध असलेल्या सार्वजनिक वाचन-सामग्रीवर आधारित आहे. “क्राईम महाराष्ट्र लाईव्ह न्युज” (Crime Maharashtra Live News) व त्याचे संपादक, प्रतिनिधी किंवा संबद्ध कर्मचारी या माहितीच्या संपूर्ण सत्यतेचा दावा करत नाहीत.ही माहिती केवळ जनहितार्थ, समाजजागृती व चर्चेसाठी प्रसिद्ध करण्यात आलेली आहे. कृपया वाचक/दर्शकांनी संबंधित अधिकृत यंत्रणांकडून खातरजमा करूनच कोणताही निर्णय घ्यावा. या माहितीमध्ये काही बाबी चुकीच्या, अपूर्ण किंवा कालांतराने बदललेल्या असू शकतात. त्यामुळे कोणतीही कायदेशीर अथवा प्रशासकीय कृती करण्यापूर्वी अधिकृत स्रोताची खात्री करणे अत्यावश्यक आहे.. तथापि, या बातम्यांमुळे उद्भवणाऱ्या कोणत्याही गैरसमज किंवा नुकसानीस Crime Maharashtra Live News जबाबदार राहणार नाही.> टीप: जर कोणाला आमच्या बातमीबाबत आक्षेप असल्यास, कृपया आम्हाला [crimemaharashtra.live@gmail.com] वर संपर्क करा.मोबाईल नंबर 7744808833
