पुणे:
पुणे शहर पोलिसांनी अंमली पदार्थांविरुद्ध चालवलेल्या मोहिमेअंतर्गत एक मोठी कारवाई केली आहे. शिवाजीनगर पोलिसांनी एका कारवाईत प्रतिबंधित मादक गोळ्यांची विक्री करणाऱ्या एका आरोपीला अटक केली असून, त्याच्याकडून ३,३८,८८०/- रुपयांचा मुद्देमाल जप्त केला आहे. विशेष म्हणजे, या गोळ्या अलीकडे ‘फुलचंद पानात’ नशकरीता वापरल्या जात असल्याची धक्कादायक माहिती समोर आली आहे.
नेमकी घटना काय?
दिनांक २८/०४/२०२६ रोजी शिवाजीनगर पोलीस स्टेशनच्या तपास पथकाचे सहायक पोलीस निरीक्षक संतोष पाटील आणि त्यांचे कर्मचारी हद्दीत गस्त घालत होते. यावेळी पोलीस अंमलदार सचिन जाधव यांना त्यांच्या खास बातमीदाराकडून गोपनीय माहिती मिळाली की, शिवाजीनगर येथील दीनदयाळ हॉस्पिटल जवळील एका निर्जन रस्त्यावर एक टेम्पो संशयास्पद स्थितीत बराच वेळ उभा आहे.
मिळालेल्या माहितीची खात्री करण्यासाठी सपोनि संतोष पाटील आणि त्यांच्या पथकाने तात्काळ घटनास्थळी धाव घेतली. त्या ठिकाणी उभ्या असलेल्या टेम्पोच्या मागील दरवाजाची कडी उघडून तपासणी केली असता, त्यामध्ये प्रतिबंधित व बेकायदेशीर मादक ‘बंट्यांच्या गोळ्या’ असलेली पाकिटे व गोणी आढळून आल्या.
आरोपीला अटक आणि तपास
या प्रकरणी पोलिसांनी विष्णू रामरतन गुप्ता (वय ३० वर्षे, रा. पिंपरी-चिंचवड, पुणे) या आरोपीचे नाव निष्पन्न करून त्याला तात्काळ अटक केली आहे. पोलिसांनी टेम्पो आणि मादक पदार्थ असा एकूण ३,३८,८८०/- रुपयांचा मुद्देमाल जप्त केला असून शिवाजीनगर पोलीस ठाण्यात गुन्हा दाखल करण्यात आला आहे. या गुन्ह्यात अन्य कोणा आरोपींचा सहभाग आहे का, याचा अधिक तपास पोलीस करत आहेत.
तपास पथक
सदरची कारवाई पुणे शहर पोलीस आयुक्त कार्यालयातील वरिष्ठ अधिकाऱ्यांच्या मार्गदर्शनाखाली पार पडली:
मार्गदर्शन: श्री. राजेंद्र बनसोडे (अपर पोलीस आयुक्त, पश्चिम प्रादेशिक विभाग), श्री. ऋषीकेश रावले (पोलीस उप-आयुक्त, परि-१), श्री. चंद्रकांत भोसले (सहा. पोलीस आयुक्त, विश्रामबाग विभाग).
कारवाईतील पथक: वरिष्ठ पोलीस निरीक्षक गिरीशकुमार दिघावकर, पोलीस निरीक्षक (गुन्हे) अमर काळंगे, सपोनि संतोष पाटील, पोलीस अंमलदार सचिन जाधव, महावीर वलटे, राजकिरण पवार, इसाक पठाण, मोहिते, दीपक रोमाडे आणि श्रीकांत मखरे.
नियम व अटी / Disclaimer:
वरील माहिती विविध ओपन सोर्स माध्यमांतून, सोशल मीडियातील चर्चांमधून तसेच उपलब्ध असलेल्या सार्वजनिक वाचन-सामग्रीवर आधारित आहे. “क्राईम महाराष्ट्र लाईव्ह न्युज” (Crime Maharashtra Live News) व त्याचे संपादक, प्रतिनिधी किंवा संबद्ध कर्मचारी या माहितीच्या संपूर्ण सत्यतेचा दावा करत नाहीत.ही माहिती केवळ जनहितार्थ, समाजजागृती व चर्चेसाठी प्रसिद्ध करण्यात आलेली आहे. कृपया वाचक/दर्शकांनी संबंधित अधिकृत यंत्रणांकडून खातरजमा करूनच कोणताही निर्णय घ्यावा. या माहितीमध्ये काही बाबी चुकीच्या, अपूर्ण किंवा कालांतराने बदललेल्या असू शकतात. त्यामुळे कोणतीही कायदेशीर अथवा प्रशासकीय कृती करण्यापूर्वी अधिकृत स्रोताची खात्री करणे अत्यावश्यक आहे.. तथापि, या बातम्यांमुळे उद्भवणाऱ्या कोणत्याही गैरसमज किंवा नुकसानीस Crime Maharashtra Live News जबाबदार राहणार नाही.> टीप: जर कोणाला आमच्या बातमीबाबत आक्षेप असल्यास, कृपया आम्हाला [crimemaharashtra.live@gmail.com] वर संपर्क करा.मोबाईल नंबर 7744808833
