पुणे, दि. २७ एप्रिल २०२६ – पुणे शहर पोलिसांच्या अमलीपदार्थ विरोधी विशेष मोहिमेत परिमंडळ-७ अंतर्गत मोठी कारवाई करण्यात आली असून विविध पोलीस ठाण्यांच्या विशेष पथकांनी संयुक्तरीत्या धडक मोहिम राबवून तब्बल ११ आरोपींना अटक केली आहे. या कारवाईत मोठ्या प्रमाणात मेफेड्रोन (एम.डी.) व गांजा जप्त करण्यात आला आहे.
पुणे शहर पोलिसांचे वरिष्ठ अधिकारी यांच्या आदेशानुसार परिमंडळ-७ हद्दीत दिनांक १७/०४/२०२६ ते २२/०४/२०२६ या कालावधीत विशेष मोहीम राबविण्यात आली. या मोहिमेत वाघोली, लोणीकंद, विमानतळ, चंदननगर व हडपसर पोलीस स्टेशन हद्दीत विशेष पथके सक्रिय करण्यात आली होती. या पथकांनी स्वतंत्र कारवाया करत अमलीपदार्थ विक्री, साठवण व वाहतूक करणाऱ्यांवर कारवाई केली.
तपासादरम्यान काही आरोपी हे बँक ट्रॅन्झॅक्शनद्वारे राजस्थान येथून मेफेड्रोन (एम.डी.) मागवत असल्याचे उघड झाले. पोलिसांनी याचा सखोल तपास करून संबंधित पुरावे गोळा केले असून या गुन्ह्यातील इतर आरोपींचा शोध सुरू आहे. तसेच राजस्थान येथील आरोपींचा मागोवा घेण्यासाठी विशेष पथके रवाना करण्यात आली आहेत.
या मोहिमेत एकूण ११ गुन्हे दाखल करण्यात आले असून ११ आरोपींना अटक करण्यात आली आहे. पोलिसांनी एकूण ₹१८,९८,२७०/- किमतीचा मुद्देमाल जप्त केला आहे. यामध्ये ₹१२,९१,४४७/- किमतीचे २६० ग्रॅम एम.डी. ड्रग्ज, तसेच ₹६,०६,८२३/- किमतीचा २० किलो ७५० ग्रॅम वजनाचा गांजा यांचा समावेश आहे. जप्त मुद्देमालाचा पुढील तपास सुरू आहे.
ही कारवाई पोलीस आयुक्त, पुणे शहर श्री. अमितेश कुमार, पोलीस सह आयुक्त श्री. रंजनकुमार शर्मा, तसेच अपर पोलीस आयुक्त, पूर्व प्रादेशिक विभाग, पुणे शहर यांच्या मार्गदर्शनाखाली करण्यात आली. तसेच पोलीस उप आयुक्त, परिमंडळ-७ श्री. सोमय मुंडे यांच्या नेतृत्वाखाली ही मोहीम राबविण्यात आली.
पोलिसांनी नागरिकांना आवाहन केले आहे की, आपल्या परिसरात कोणीही अमलीपदार्थांची विक्री, साठवण किंवा सेवन करत असल्याचे आढळल्यास त्वरित संबंधित पोलीस स्टेशनशी संपर्क साधावा किंवा नियंत्रण कक्ष टोल फ्री क्रमांक ११२ वर माहिती द्यावी.
पुणे शहर पोलिसांकडून पुढील काळातही अमलीपदार्थ विरोधी मोहिमा अधिक तीव्र करण्यात येणार असल्याचे स्पष्ट करण्यात आले आहे.
नियम व अटी / Disclaimer:
वरील माहिती विविध ओपन सोर्स माध्यमांतून, सोशल मीडियातील चर्चांमधून तसेच उपलब्ध असलेल्या सार्वजनिक वाचन-सामग्रीवर आधारित आहे. “क्राईम महाराष्ट्र लाईव्ह न्युज” (Crime Maharashtra Live News) व त्याचे संपादक, प्रतिनिधी किंवा संबद्ध कर्मचारी या माहितीच्या संपूर्ण सत्यतेचा दावा करत नाहीत.ही माहिती केवळ जनहितार्थ, समाजजागृती व चर्चेसाठी प्रसिद्ध करण्यात आलेली आहे. कृपया वाचक/दर्शकांनी संबंधित अधिकृत यंत्रणांकडून खातरजमा करूनच कोणताही निर्णय घ्यावा. या माहितीमध्ये काही बाबी चुकीच्या, अपूर्ण किंवा कालांतराने बदललेल्या असू शकतात. त्यामुळे कोणतीही कायदेशीर अथवा प्रशासकीय कृती करण्यापूर्वी अधिकृत स्रोताची खात्री करणे अत्यावश्यक आहे.. तथापि, या बातम्यांमुळे उद्भवणाऱ्या कोणत्याही गैरसमज किंवा नुकसानीस Crime Maharashtra Live News जबाबदार राहणार नाही.> टीप: जर कोणाला आमच्या बातमीबाबत आक्षेप असल्यास, कृपया आम्हाला [crimemaharashtra.live@gmail.com] वर संपर्क करा.मोबाईल नंबर 7744808833
