पुणे : पुणे महानगरपालिकेसमोर रस्त्यावरचे विक्रेते, फुटपाथ हॉकर्स आणि स्टॉल धारकांच्या विविध प्रश्नांसाठी सुरू असलेल्या उपोषणाची अखेर जागरूक नागरिक विकास मंचाच्या मध्यस्थीने यशस्वी सांगता झाली. राष्ट्रवादी काँग्रेस (शरद पवार गट) पक्षाचे पुणे शहर पदाधिकारी अथर्व सोनवणे यांनी आंदोलनाच्या माध्यमातून मांडलेल्या मागण्यांवर पुणे महानगरपालिकेने सकारात्मक भूमिका घेत त्यातील महत्त्वाच्या मागण्या मान्य केल्यानंतर उपोषण मागे घेण्यात आले.
शहरातील रोडसाईड विक्रेते, फुटपाथ हॉकर्स आणि लघु स्टॉल धारकांना भेडसावणाऱ्या विविध समस्यांवर लक्ष वेधण्यासाठी हे आंदोलन करण्यात आले होते. या आंदोलनात विक्रेत्यांवरील थकबाकी, दंड आणि व्याजामध्ये सवलत देणे तसेच त्यांना कायदेशीर चौकटीत व्यवसाय करण्यासाठी संधी देण्याच्या दृष्टीने अमनेस्टी (Amnesty) योजना लागू करण्याची मागणी प्रमुख होती.
दरम्यान, पुणे महानगरपालिकेच्या अतिक्रमण / अनधिकृत बांधकाम निर्मूलन विभागाकडून आंदोलनकर्त्यांना लेखी पत्र देण्यात आले. या पत्रामध्ये शहरातील रस्त्यावरच्या विक्रेत्यांबाबतचे प्रश्न शहर फेरीवाला समितीच्या बैठकीत चर्चेला घेऊन नियमांनुसार योग्य तो निर्णय घेतला जाईल, तसेच संबंधित मागण्यांवर सकारात्मक कार्यवाही करण्यात येईल, असे आश्वासन देण्यात आले.
या पार्श्वभूमीवर जागरूक नागरिक विकास मंचाचे संस्थापक अध्यक्ष सुनील पवार, पुणे जिल्हा अध्यक्ष ऋषिकेश सावंत, पुणे शहर कार्याध्यक्ष उमेर शेख तसेच पुणे शहर अध्यक्ष (अनुसूचित जाती-जमाती व पथारी सेल) यांच्या मध्यस्थीने आंदोलनकर्ते आणि प्रशासन यांच्यात सविस्तर चर्चा झाली. चर्चेनंतर प्रशासनाने आंदोलनकर्त्यांच्या मागण्यांबाबत सकारात्मक भूमिका घेतल्याने अथर्व सोनवणे यांनी समाधान व्यक्त करत उपोषण मागे घेण्याचा निर्णय घेतला.
या आंदोलनामुळे शहरातील हजारो रस्त्यावर व्यवसाय करणाऱ्या लघु विक्रेत्यांचे प्रश्न पुन्हा एकदा चर्चेत आले असून, महानगरपालिकेने घेतलेल्या निर्णयामुळे या व्यावसायिकांना मोठा दिलासा मिळण्याची अपेक्षा व्यक्त करण्यात येत आहे.
दरम्यान, या प्रकरणाकडे पुणे महानगरपालिकेचे प्रशासन, सामाजिक संघटना तसेच नागरिकांचे लक्ष लागले असून, भविष्यात शहरातील हॉकर्स आणि स्टॉल धारकांच्या प्रश्नांवर अधिक सकारात्मक आणि दीर्घकालीन उपाययोजना होण्याची अपेक्षा व्यक्त केली जात आहे.
नियम व अटी / Disclaimer:
वरील माहिती विविध ओपन सोर्स माध्यमांतून, सोशल मीडियातील चर्चांमधून तसेच उपलब्ध असलेल्या सार्वजनिक वाचन-सामग्रीवर आधारित आहे. “क्राईम महाराष्ट्र लाईव्ह न्युज” (Crime Maharashtra Live News) व त्याचे संपादक, प्रतिनिधी किंवा संबद्ध कर्मचारी या माहितीच्या संपूर्ण सत्यतेचा दावा करत नाहीत.ही माहिती केवळ जनहितार्थ, समाजजागृती व चर्चेसाठी प्रसिद्ध करण्यात आलेली आहे. कृपया वाचक/दर्शकांनी संबंधित अधिकृत यंत्रणांकडून खातरजमा करूनच कोणताही निर्णय घ्यावा. या माहितीमध्ये काही बाबी चुकीच्या, अपूर्ण किंवा कालांतराने बदललेल्या असू शकतात. त्यामुळे कोणतीही कायदेशीर अथवा प्रशासकीय कृती करण्यापूर्वी अधिकृत स्रोताची खात्री करणे अत्यावश्यक आहे.. तथापि, या बातम्यांमुळे उद्भवणाऱ्या कोणत्याही गैरसमज किंवा नुकसानीस Crime Maharashtra Live News जबाबदार राहणार नाही.> टीप: जर कोणाला आमच्या बातमीबाबत आक्षेप असल्यास, कृपया आम्हाला [crimemaharashtra.live@gmail.com] वर संपर्क करा.मोबाईल नंबर 7744808833
