पुणे, कोंढवा (दि. 19 मार्च 2026):
पर्यावरण संरक्षण आणि ऊर्जा बचतीच्या दिशेने एक महत्त्वपूर्ण पाऊल उचलत कोंढवा परिसरातील थ्री ज्वेल्स अपार्टमेंट या गृहनिर्माण संकुलात 400 किलोवॅट क्षमतेच्या सौर ऊर्जा प्रकल्पाचे उद्घाटन गुढीपाडव्याच्या शुभमुहूर्तावर उत्साहात पार पडले. या प्रकल्पाचे उद्घाटन मा. आमदार योगेश आण्णा टिळेकर
(विधानपरिषद, महाराष्ट्र) यांच्या हस्ते करण्यात आले.
या कार्यक्रमास प्रभाग क्रमांक 40 च्या नगरसेविका श्रीमती रंजना टिळेकर, सौ. अर्चना जगताप, सौ. वृषाली कामठे, सौ. पूजा कदम यांच्यासह परिसरातील कार्यकर्ते राहुलअप्पा टिळेकर, तुषार कदम, श्रीकांत कामठे, उमेश दांडेकर यांची प्रमुख उपस्थिती होती.
सुमारे 1600 सदनिकांचे हे विशाल निवासी संकुल असून, येथे उभारण्यात आलेला 400 KW सौर ऊर्जा प्रकल्प हा पुणे जिल्ह्यातील निवासी प्रकल्पांपैकी सर्वात मोठ्यांपैकी एक मानला जात आहे. या प्रकल्पामुळे संकुलाच्या सामायिक वीज वापराचा मोठा हिस्सा सौर ऊर्जेतून भागवला जाणार असून, वीज खर्चात मोठी बचत होणार आहे. याशिवाय कार्बन उत्सर्जनात घट होऊन पर्यावरण संवर्धनाला चालना मिळणार आहे.
कार्यक्रमाच्या प्रारंभी सोसायटीचे सचिव पांडुरंग भोले यांनी प्रास्ताविकातून प्रकल्पाचा संपूर्ण प्रवास उलगडला. अध्यक्ष सूर्यकांत खुरसे यांनी या सोलर प्रकल्पामागील उद्दिष्टे स्पष्ट करत सर्व सभासदांच्या सहकार्याबद्दल समाधान व्यक्त केले.
या प्रकल्पासाठी सुमारे 2.25 कोटी रुपयांचा खर्च करण्यात आला असून, शासनाच्या धोरणानुसार अंदाजे 68 लाख रुपयांची सबसिडी अपेक्षित आहे. या प्रकल्पातून होणाऱ्या विजनिर्मितीमुळे दरवर्षी सुमारे 1 कोटी रुपयांची वीज बिल बचत होण्याचा अंदाज व्यक्त करण्यात आला आहे.
तांत्रिक बाजू मांडताना संजय मुळे यांनी प्रकल्प राबविताना आलेल्या अडचणी आणि त्यावर मात करण्यासाठी केलेल्या उपाययोजनांची माहिती दिली, तर रुपेश शहा यांनी स्ट्रक्चरल आव्हानांबद्दल सविस्तर विवेचन केले.
यावेळी आमदार योगेश टिळेकर यांनी सौर ऊर्जेच्या वाढत्या महत्त्वावर प्रकाश टाकत, अशा उपक्रमांमुळे शाश्वत विकासाला चालना मिळते असे सांगितले. तसेच राज्य सरकार सौर ऊर्जेला प्रोत्साहन देत असल्याचे नमूद केले. त्यांनी प्रकल्प यशस्वीरीत्या पूर्ण केल्याबद्दल सोसायटीचे पदाधिकारी, सोलर कमिटी सदस्य, तांत्रिक सल्लागार तसेच नेचर लाईट कंपनीचे सर्व कर्मचारी आणि भागीदार यांचे अभिनंदन केले.
कार्यक्रमाच्या शेवटी उपाध्यक्ष प्रल्हाद दुधाळ यांनी उपस्थितांचे आभार मानले.
कोंढवा परिसरातील प्रमुख गृहनिर्माण संकुलांपैकी एक असलेल्या थ्री ज्वेल्स अपार्टमेंटने उचललेले हे पाऊल इतर सोसायट्यांसाठीही प्रेरणादायी आणि मार्गदर्शक ठरणार असल्याचे मत व्यक्त करण्यात आले.
नियम व अटी / Disclaimer:
वरील माहिती विविध ओपन सोर्स माध्यमांतून, सोशल मीडियातील चर्चांमधून तसेच उपलब्ध असलेल्या सार्वजनिक वाचन-सामग्रीवर आधारित आहे. “क्राईम महाराष्ट्र लाईव्ह न्युज” (Crime Maharashtra Live News) व त्याचे संपादक, प्रतिनिधी किंवा संबद्ध कर्मचारी या माहितीच्या संपूर्ण सत्यतेचा दावा करत नाहीत.ही माहिती केवळ जनहितार्थ, समाजजागृती व चर्चेसाठी प्रसिद्ध करण्यात आलेली आहे. कृपया वाचक/दर्शकांनी संबंधित अधिकृत यंत्रणांकडून खातरजमा करूनच कोणताही निर्णय घ्यावा. या माहितीमध्ये काही बाबी चुकीच्या, अपूर्ण किंवा कालांतराने बदललेल्या असू शकतात. त्यामुळे कोणतीही कायदेशीर अथवा प्रशासकीय कृती करण्यापूर्वी अधिकृत स्रोताची खात्री करणे अत्यावश्यक आहे.. तथापि, या बातम्यांमुळे उद्भवणाऱ्या कोणत्याही गैरसमज किंवा नुकसानीस Crime Maharashtra Live News जबाबदार राहणार नाही.> टीप: जर कोणाला आमच्या बातमीबाबत आक्षेप असल्यास, कृपया आम्हाला [crimemaharashtra.live@gmail.com] वर संपर्क करा.मोबाईल नंबर 7744808833
