पुणे: पुणे शहरातील बंडगार्डन वाहतूक विभागांतर्गत येणाऱ्या आर.टी.ओ. चौक आणि शाहीर अमर शेख चौक परिसरात होणारी सततची वाहतूक कोंडी टाळण्यासाठी, तसेच या मार्गावरील वाहतूक अधिक सुरक्षित व सुरळीत करण्यासाठी वाहतूक पोलिसांकडून मोठे बदल करण्यात आले आहेत.
महाराष्ट्र शासनाच्या गृह विभागाच्या २७/०९/१९९६ च्या नोटिफिकेशननुसार, मोटार वाहन कायदा कलम ११५, ११६(१) (ए) (बी), ११६(४) आणि ११७ अन्वये प्राप्त झालेल्या अधिकारांचा वापर करून, पुणे शहराचे पोलीस उप-आयुक्त (वाहतूक शाखा) संदीप भाजीभाकरे यांनी हे तात्पुरते आदेश निर्गमित केले आहेत.
वाहतुकीतील प्रमुख बदल खालीलप्रमाणे आहेत:
उजवीकडे वळण्यास बंदी (राईट टर्न बंद): शाहीर अमर शेख चौकाकडून येऊन आर.टी.ओ. चौकातून उजवीकडे वळून येरवडा, रुबी हॉस्पिटल आणि जहांगीर चौकाकडे जाणारी वाहतूक पूर्णपणे बंद करण्यात आली आहे.
पर्यायी मार्ग (यु-टर्न): शाहीर अमर शेख चौकाकडून येणाऱ्या वाहनांना आता आर.टी.ओ. चौकातून डावीकडे वळण घ्यावे लागेल. तिथून सरळ १०० मीटर पुढे जाऊन, संगम ब्रिजच्या आधी ‘यु-टर्न’ (U-Turn) घेऊन वाहने येरवडा, रुबी व जहांगीर चौकाकडे आपल्या इच्छित स्थळी जाऊ शकतील.
नो पार्किंग झोन घोषणा: आर.टी.ओ. चौकातील कोको पेट्रोल पंप ते संगम ब्रिज दरम्यान वाहने थांबून वाहतुकीस अडथळा निर्माण होऊ नये, यासाठी या दरम्यानचा ३०० मीटरचा रस्ता ‘नो पार्किंग झोन’ म्हणून घोषित करण्यात आला आहे.
संगम ब्रिज वाहतूक: इंजिनिअरिंग कॉलेज (COEP) चौकाकडून येऊन संगम ब्रिजवरून आर.टी.ओ. कडे जाणाऱ्या वाहनांनी डाव्या बाजूच्या ब्रिजचा वापर करावा, असे आवाहन करण्यात आले आहे.
महत्त्वाची टीप: हे नियम अत्यावश्यक सेवेतील वाहनांना (उदा. रुग्णवाहिका, फायरब्रिगेड, पोलीस वाहने इत्यादी) लागू राहणार नाहीत.
नागरिकांना हरकती व सुचना नोंदवण्याचे आवाहन
या वाहतूक बदलांबाबत नागरिकांच्या काही सुचना किंवा हरकती असल्यास, त्यांनी दिनांक २३/०५/२०२६ ते दिनांक ०६/०६/२०२६ पर्यंत आपले म्हणणे लेखी स्वरूपात ‘पोलीस उप-आयुक्त, वाहतूक नियंत्रण शाखा, येरवडा पोस्ट ऑफिस जवळ, बंगला नं. ६, एअरपोर्ट रोड, पुणे-४११००६’ या कार्यालयात सादर करावे. नागरिकांच्या सूचना व हरकतींचा योग्य विचार करूनच या संदर्भातील अंतिम आदेश काढण्यात येतील, असे पोलीस उप-आयुक्त संदीप भाजीभाकरे यांनी स्पष्ट केले आहे.
नियम व अटी / Disclaimer:
वरील माहिती विविध ओपन सोर्स माध्यमांतून, सोशल मीडियातील चर्चांमधून तसेच उपलब्ध असलेल्या सार्वजनिक वाचन-सामग्रीवर आधारित आहे. “क्राईम महाराष्ट्र लाईव्ह न्युज” (Crime Maharashtra Live News) व त्याचे संपादक, प्रतिनिधी किंवा संबद्ध कर्मचारी या माहितीच्या संपूर्ण सत्यतेचा दावा करत नाहीत.ही माहिती केवळ जनहितार्थ, समाजजागृती व चर्चेसाठी प्रसिद्ध करण्यात आलेली आहे. कृपया वाचक/दर्शकांनी संबंधित अधिकृत यंत्रणांकडून खातरजमा करूनच कोणताही निर्णय घ्यावा. या माहितीमध्ये काही बाबी चुकीच्या, अपूर्ण किंवा कालांतराने बदललेल्या असू शकतात. त्यामुळे कोणतीही कायदेशीर अथवा प्रशासकीय कृती करण्यापूर्वी अधिकृत स्रोताची खात्री करणे अत्यावश्यक आहे.. तथापि, या बातम्यांमुळे उद्भवणाऱ्या कोणत्याही गैरसमज किंवा नुकसानीस Crime Maharashtra Live News जबाबदार राहणार नाही.> टीप: जर कोणाला आमच्या बातमीबाबत आक्षेप असल्यास, कृपया आम्हाला [crimemaharashtra.live@gmail.com] वर संपर्क करा.मोबाईल नंबर 7744808833
